نكت جميلة اوي

• واحد غبي قدامه مية نار حط صباعه فيها ملقاش عقلة صباعه الاولى قام حاطت دماغه يدور عليها

• مره واحد محمل فراخ .وهوه معدي علي كمين الظابط ساله محمل ايه قالو فراخ يابيه قاله بتاكلهم ايه رد عليه السواق باكلهم علف ودره ام الظابط قاله لا الفراخ مايكلوش علف و دره دول بيكلو لانشون وبسطرمه وراح عملو مخالفه فالسواق بعد مامشي جه عالكمين التاني فالظابط بيساله محمل ايه قاله فراخ يا باشا قاله بتاكلهم ايه قاله لانشون و بسطرمه قالو ازاي دة الفراخ بتاكل دره وعلف مش لانشون وبسطرمه وراح عمله مخا لفه تانى وبعد السواق مامشي وجه عالكمين التالت فالظابط بيساله محمل ايه يا اسطي قالو فراخ يا باشا قلو بتاكلهم ايه قاله بص يا باشا انا بدي كل فرخه نص جنيه وهيه تاكل اللي علي مزجها

• مرة واحد غبي ماشى فى الشارع قال يارب يااااارب احط ايدى في جيبى الاقى 10جنيه يااااارب، حط ايده في جيبه لاقاه مخروم رجع يدور عليها لتكون وقعت

• مره واحد كداب قوى بيقول لصاحبه انا كنت ماشى فى الصحره طلع عليا اسد نطيت في البحر،صاحبه قاله بحر ايه بس اللي فى الصحره، قال لا انا قلت لقيت ابو الهول اتشعلقت فى رقبته، صاحبه قاله وايه اللي جاب ابو الهول في الصحرا، فقال وانا ماشى فى الصحره طلع عليا اسد أكلنى.. ارتحت

• مره اتنين متاخرين على المدرسه الاستاذ بيسال الاول انت ايه اللى اخرك قاله كانت فيه 5 جنيه ضيعه مني وبدور عليها فمسك التانى وانته ايه اللى اخرك قاله أصل انا اللى كنت دايس عليها

• عملوا جائزة مليون جنيه للي عنده 10 عيال، واحد عنده تسعة قال لمراته أنا كنت متجوز عليكى ومعايا ولد أروح أجيبه ونكمل العشرة ونكسب الجايزة، قالتله ماشى .. راح ولما رجع ملقاش العيال سأل مراته فين العيال قالتله كل عيل أبوه جه خده.

• مره واحد سرق فرخه وراح عند البحر نضفها وكلها جه الضابط وقاله انت سرقت الفرخه قاله لا يا باشا قاله الضابط والريش ده؟ قاله دى نزلت تستحمى و قالتلى اخلى بالى من الهدوم

• مره واحد غبي جزمته اتقطعت راح خيطها وبعد اسبوع لاقاها سليمه فك الخياطه تانى

• واحد ركب اتوبيس.. جاله الكمسرى بيقول له تذاكر ... قاله امين شرطه..... سابه وراح للجانبه قاله: تذاكر ... قاله: أبراهيم شرطه

• مرة اتنين ستات عواجيز نفسهم يتجوزوا فراحوا النادي وقالوا اول ولد حيعدي حنقوله، و لما عدى واحد، واحدة منهم قالتله: تتجوزني يا امور؟ قالها: ده انا اتجوز كلبة ومتجوزكيش! التانية راحت قايلة: هوهو

• واحدة عجوزة لقت خاتم سليمان .. طلعلها العفريت قاللها نفسك فى ايه؟ قالتله نفسى اصغر فى السن خلاها 40 سنه قالتله انا عاوزة ابقى اصغر من كدة . خلاها20 سنة . قالتله كمان . خلاها 4 سنين .. جالها الحصبة ماتت

• 2 حرامية حبوا يسرقوا شقة واحد , ففى واحد نط فى البلكونة راح الراجل مسكه فقاله انت بتعمل اية هنا قالة بص ياعم الحج انا كنت بحارب الاعداء بالطيارة بتاعتى وفجأة انضربت ونطيط بالبرشوت هنا . راح الراجل قايلة ايوة كدة انت بطل مش التانى اللى نايم فى البانيو ويقولى ضفادع بشرية

• انعقد مؤتمر دولي في فرنسا وكان بعنوان الأتصالات والتكنولوجيا المعاصرة ، فبدأ بالحديث فيلسوف فرنساوي وقال لقد حفرنا تحت برج ايفل ولقينا أسلاك تليفونات وده دليل على انه احنا عندنا التليفونات بقالها اكتر من 100 سنة ، وقام الإيطالي وقال احنا حفرنا تحت برج بيزا ولقينا أسلاك تليفونات وده دليل انه احنا عندنا التليفونات بقالها اكتر من 500 سنة ، وقام البروفيسور العظيم المصري وقال: احنا حفرنا تحت الأهرامات وملقيناش حاجة وده دليل على انه احنا عندنا الموبيلات بقالها اكتر من 7000 سنة

• مرة واحد غبي حب يطور الطيارة الهليكوبتر فك المروحة وركب بدالها تكييف

• واحد قبل مايموت جمع ولاده التلاتة وحب يوصيهم يفضلوا ايد واحدة ،وأعطى لكبيرهم عود خشب كسره بسهوله أعطاه اتنين كسرهم بسهولة برضه أعطاه خمسين عود كسرهم بسهوله قال لهم طالما معاكم البغل ده مافيش خوف عليكم

• مره فى ثلاثه بنات حلوين ماشيين فى الشارع . واحده بتقول انا عايزه اتجوز واحد يكون له هيبه وشأن عظيم , والثانيه تقول انا عايزه اتجوز واحد من اليابان , والثالثه عايزه تتجوز لاعب كوره مصرى مشهور ، واحد كان ماشى وراهم وسمعهم ام راح يسلم عليهم ويقول انا العميد يونج يانج الشهير بابو تريكا

• مرة واحدة قالت لزوجها اليوم بصيت لنفسى فى المراية لقيت نفسى قمر14 تفتكر كده غرور قالها لأ غرور ايه ده كدة يبقى عمى

• مرة واحد زعلان مع مراته كتب لها ورقة مكتوب فيها صحينى الساعة 6 الصبح قام الساعة 11 لقا ورقة مكتوب عليها اوم اصحا الساعة 6

• مرة اثنين كدابين قوي قاعدين امام الاهرمات الاول قال للثانى تعرف الهرم ده امى هى اللى بانيته فالتانى قاله تعرف البحر الميت قاله اه قاله اخواتى هما اللى قتلوه

ــ مرة تلميذ بيسأل الأستاذ بيقول له : هو ممكن يعاقب الإنسان على حاجة معملهاش؟ قال له:لا طبعا . ففرح التلميذ اوى و قال له خلاص انا معملتش الواجب

ــ واحد اخترع حبوب للحامل علشان المولود يطلع مؤدب وكل مولود فعلا نزل مؤدب . واحدة أخدت الحبوب وماولدتش في المعاد

فراحت للدكتور عملها ولادة قيصرية ، لقى توأم كل واحد بيعزم علي التانى ويقول له "اتفضل" التاني يقوله "لأ اتفضل إنت الأول."

ــ تلميذ أحول بيكتب حلو قوى ..ولكن فى كراسة زميله ..الأبلة قالتله لو ركزت وكتبت فى كراستك هاديلك هدية حلوة ..فكتب فى كراسته ..راحت الأبله ادته بسكوتة . فتحها واكلها للى جنبه

ــ مره المدرس سأل الاطفال فى الفصل الى يفتكر نفسه غبى يقف ... بعد شويه وقف تلميذ ...فساله المدرس و ليه بقه يا سيدي بتفتكر نفسك غبي ..فرد عليه التلميذ اصلي ماحبيتش اشوفك واقف لوحداك يا أستاذ

موضوع: رد: نكت جميلة اوي السبت مايو 10, 2008 7:48 pm

شكرا لردك بشمهندس وائل

موضوع: رد: نكت جميلة اوي السبت مايو 10, 2008 10:21 pm